Поступок пред Локалним омбудсманом реґуловани зоз Одлуку о Локалному омвудсману („Службени новини Городу Нового Саду“ число 59/2019). Локални омбудсман порушує поступок по притужби граждана або на власну инициятиву. Гражданє подноша притужбу у писаней форми, уключуюци шицки способи електронскей комуникациї, або усмено на записнїк. Притужба муши мац особни податки подношителя притужби и муши мац факти и докази хтори подпераю наводзенє зоз притужби. Попри права на порушованє и водзенє поступку, Локални омбудсман ма право же би зоз даваньом добрих услугох, поштредованьом и даваньом совита и думаня о питаньох зоз своєй компетентносци дївствовал превентивно, зоз цильом унапредзованя роботи орґанох управи и унапредзованя защити людских правох и шлєбодох.
Поступок пред Локалним омбудсманом безсплатни, а пре єдноставнєйшу процедуру, направени и образец притужби хторого гражданє пополнюю. Спрам потреби заняти у Фаховей служби Локалного омбудсмана даваю помоц гражданом кед пополнюю притужби.
Локални омбудсман нє поступа спрам анонимних притужбох, окрем кед преценї же у анонимней притужби єст основи за його поступанє, кед поступок порушує на власну инициятиву. Притужба ше муши поднєсц на сербским язику або на язикох националних меньшинох хтори у службеним хаснованю на териториї Городу Нового Саду. Поступок пред Локалним омбудсманом нє явни.
По розпатраню притужби Локални омбудсман овласцени поднєшену притужбу одруциц, кед иста нє виполнює шицки условия же би ше спрам нєй могло поступац, алє и у тим случаю Локални омбудсман дава подношителю притужби евентуално други можлївосци за витворйованє и защиту його правох. Локални омбудсман нє поступа у случайох кед притужба нєма податки на основи хторих ше подношитель притужби нє може зоз сиґурносцу идентификовац (анонимна вимога); кад притужба нє ма други предписани податки, а подношитель притужби нє одклонєл тоти нєдостатки анї у додатно охабеним термину; кед є нє компетентни за поступанє по притужби; кед притужба поднєшена уж кед прейдзе термин од єдного рока поконченого потупеня  права граждана, односно остатнього поступаня або нєпоступаня орґана, односно служби у вязи зоз потупеньом правох; кед ше роби о повтвореней притужби хтора нє ма нови наводзеня и факти хтори ю подпераю; кед ше роби о злохаснованю права на подношенє притужби; кед спрам одлуки у предмету на хтори ше притужба одноши нє принєсол другоступньови орґан; або кед ше роби о предмету у хторим у цеку управни спор або други судски поступок. Процив одлуки Локалного омбудсмана о одруцованю притужби ше нє можу хасновац правни средства.
Локални омбудсман у обовязки обвисциц подношителя притужби и орґан управи на хтори ше притужба одноши, як и у случаю кед утвердзи же нєт основи за порушованє и водзенє поступку по притужби, так и у случаю кед одлучи порушац поступок по притужби. Кед Локални омбудсман одлучи порушац поступок длужни є набавиц становиско орґана, односно служби на чийо поступки ше притужба одноши, з тим же орґан, односно служба длужна обвисциц Локалного омбудсмана о свїм становиску у термину хтори му Локални омбудсман одредзел, а хтори нє може буц кратши од 8, анї длугши як 30 днї од дня приманя обвисценя Локалного омбудсмана о порушованю поступку.  
Одвит орґана, односно служби ше доручує подношотелю притужби, хтори ма термин од 15 днї же би ше на исти вияшнєл. Кед притужитель задовольни зоз поступаньом орґана, або нє одвитує у охабеним термину, поступок ше обуставя. Кед подношитель притужби нє задовольни зоз одвитом орґана, Локални омбудсман може одлучиц же би поступок обуставел або же би глєдал нови факти або докази.
Кед Локални омбудсман найдзе же нє исновали нєдостатки у роботи орґана, або служби, обуставя ше поступок, як и у ситуацийох кед орґан, односно служба одклонєла потупенє або; кед подношитель нє сотрудзує у поступку або поцагнє притужбу; як и кед ше поруша други одвитуюци поступок за защиту правох.
У ситуацийох кед Локални омбудсман найдзе же исновали нєдостатки у роботи орґана, односно служби упуцує препоруку, думанє або предклад орґану, односно служби о тим же як би обачени нєдостаток требало одклонїц зоз тим же орґан, односно служба длужни обвисциц Локалного омбудсмана о мирох хтори порушали, односно о причинох пре хтори нє поступел по препоруки, думаня або предкладу у термину хтори нє може буц кратши як 15, анї длугши як 30 днї.  
Кед орґан управи нє поступи по препоруки, думаню або предкладу односно нє обвисци Локалного омбудсмана о мирох хтори порушал, односно кед Локални омбудсман трима же порушани мири нє одвитуюци, обвисци ше о тим орґан хтори коньчи надпатранє їх роботи, односно Скупштина Городу Нового Саду або Городска рада, а може ше и препоручиц утвердзованє одвичательносци старшини хтори руководзи зоз орґаном, односно службом.
У своїм думаню, предкладу и препоруки Локални омбудсман може: предложиц орґану, односно служби же би одколнєл нєдостатки хтори обачени у роботи, зоз предкладом конкретних мирох; предложиц орґану, односно служби же би ознова запровадзели поступок за уважованє його препорукох; предложиц порушованє дисиплинского поступку процив службеней особи у орґану, односно служби, за хтору утвердзене же є одвичательна за потупенє правох граждана або хтора зоперала поступок пред Локалним омбудсманом; обвисциц компетентни орґан о иснованю елементох потупуюцей або виновней одвичательносци службеней особи зоз цильом порушованя одвитуюцого поступку; предложиц компетентному орґану порушованє поступка за розришованє функционера кед у його роботи установел нєправилносци хтори приведли до чежких и систематских потупеньох людских правох и шлєбодох; або дати препоруки и предклади орґану, односно служби за унапредзованє їх роботи и одношеня ґу гражданом.