Спрам члену 29. Одлуки о Локалним омбудсману, пред подношеня притужби особох хтори тримаю же им зоз актом, дїлованьом або нєдїлованьом орґана, односно служби потупени права, длужни су пробовац охранїц свойо права у одвитуюцим поступку пред компетентним орґаном. Локални омбудсман длужни граждана упуциц на порушованє одвитуюцого поступка пред компетентним орґаном, кед таки поступок предписани, а нє будзе порушовац поступок док нє буду вичерпани шицки правни средства.

Кед Локални омбудсман утвердзи же исновали нєдостатки у роботи орґанох, односно служби, упуцує препоруку, думанє або предклад орґану о тим на хтори способ би обачени нєдостаток требал буц одклонєти.  

Локални омбудсман ма и овласценє поднєсц инициятиву за вименку одлукох и других общих актох, кед дума же до потупеня правох граждана хтори настал пре нєдостаток у предписаньох, як и иницирац приношенє нових одлукох и других общих актох, кед трима же то значне за витворйованє и защиту правох граждана.

Поступок пред Локалним омбудсманом Городу Нового Саду ше у найвекшим чишлє случайох порушує спрам притужби граждана/ки. (Поступок пред Локалним омбудсманом як и способ поношеня притужби подробно потолковани у рубрики „Поступок“ хтори ше находзи на початним боку сайта)
Попри наведзеного, Локални омбудсман Городу Нового Саду може одлучовац порушац поступок спрам власней инициятиви кед на основи власних спознаньой або на основи спознаньох хтори достати зоз других жридлох, уключуюци и винїмково и анонимни притужби, оценї же зоз актом, дїлованьом и нєдїлованьом орґанох, односно служби пришло до потупеня людских правох и шлєбодох.

Поступок пред Локалним омбудсманом Городу Новог Саду безплатни.

Локални омбудсман Городу Нового Саду нє може участвовац у ришованю проблемох хтори ше зявюю медзи физичним особами, з оглядом же зоз членом 2. Одлуки о Локалним омбудсману предписане же Локални омбудсман Городу Нового Саду контролує лєм роботу орґанох, орґанизацийох, подприємствох и установох чийо снователь Город Нового Саду.

Локални омбудсман Гророду Нового Саду ше нє занїма з роботу коло даваня правней помоци.
Роботи правней помоци на териториї Городу Нового Саду, у складзе зоз одреднїцами Одлуки о способу и условийох даваня правней помоци гражданом на териториї Городу Нового Саду ("Сл. новини Городу Нового Саду", число 46/2009 и 47/2012), коньчи Биро за даванє правней помоци хтори ше находзи у улїчки Войводянских бриґадох число 17 у Новим Садзе.  
Роботи правней помоци коньча и адвокати.  
Безплатну правну помоц у складзе зоз Законом о безплатней правней помоци ("Сл. глашнїк РС", число 87/2018) даваю адвокатура и служби правней помоци у єдинкох локалней самоуправи. Особи хтори маю у складзе зоз тим законом наведзене право подноша Кондзелариї за безплатну правну помоц вимогу за витворйованє безплатней правней помоци. Кондзелария ше находзи у улїчки Войводянских бриґадох 17 у Новим Садзе.

Локални омбудсман Городу Нового Саду нє контролує роботу приватних фирмох зоз шедзиском у Новим Садзе, алє лєм роботу орґанох, орґанизацийох, подприємствох чийо снователь Город Нови Сад.

Локални омбудсман Городу Нового Саду нє контролує роботу републичних и покраїнских орґанох и подприємствох хтори ше находза у Новим Садзе, з оглядом же зоз Одлуку о Локалним омбудсману то нє предвидзене як компетентносц того орґана.

Зоз членом 21. пасус 4. Одлуки о Локалним омбудсману предписане же Локални омбудсман нє овласцени контроловац роботу судох и явних тужительствох.

Зоз членом 21. пасус 3. Одлуки о Локалним омбудсману предписане же Локални омбудсман нє овласцени контроловац роботу Скупштини Городу, Городоначалнїка Городу Нового Саду и Городскей ради Городу Нового Саду, окрем кед поступа як другоступньови орґан.